04/12/2008
文： 樂比堅尼
歐洲足協盃八場分組賽今晚同時舉行，英超雙雄分途出擊，樸茨茅夫作客德甲禾夫斯堡，阿士東維拉主場對斯洛伐克球隊斯利納。Ｅ組樸茅要搶分出線，撞正「德甲大盤王」，唔買大就笨。Ｆ組維拉雖然六分在手，但英國球隊踢足協盃好少流攤，「讓球主勝」捧得過。（周五凌晨３時45分開賽）
樸茅同德甲大王key
先講Ｅ組，榜首ＡＣ米蘭得七分已肯定出線，禾夫斯堡得六分形勢亦大好，如果同組另一場布拉加贏海倫芬，樸茨茅夫呢場贏唔到即出局，故樸茅一定會住另一場戰果。當然，最穩陣方法就係自己全取三分，所以今場出現大比數戰果絕對唔奇。
禾夫斯堡今季入波當食生菜，尤其係主場更加不得了，七戰全開大，平均每場入三球，淨係靠自己都開到大，完全唔使假手於人。大家咪以為到歐洲賽事，呢條攤路就會改，因為兩場分組賽，禾堡照樣大手交易，分別主場五比一大勝海倫芬及作客贏布拉加三比二，以佢咁進取踢法，今場大盤有1.8倍真係筍到暈。
樸茅近幾仗失波頻頻，近三場失六球之多，主要原因係兩名防守球員蘇甘保及狄亞拉缺陣，幸好佢前鋒生性，即使迪科爾因傷缺陣，但「長人陣」高治拍簡奴又有令人驚喜效果。樸茅呢期入得又失得，捧大數。
維拉打真軍炒斯利納
Ｆ組方面，維拉住六分都仲要捧，樂比仔當然唔係「山草藥」得就，自歐洲足協盃三年前改制以來，英超球隊分組賽出線率係百分之百（共八隊），不敗率係93％，勝率亦高達66％（41戰27勝11和３負），有呢個咁強勁賽績，除因為近年英超水準不斷提升，英超球隊作戰態度亦係主要原因，所以樂比仔否決維拉今場會流攤可能性，加上維拉近期連和兩場，極需一場勝仗提高士氣，面對三戰僅得一分「魚腩」斯利納，贏兩球係基本消費。