03/12/2008
文： Mic少
歐洲足協盃B組賽事，兩大名牌對壘，哈化柏林主場迎戰加拉塔沙雷，哈化近期晒火，聯賽取得四連勝，直逼榜首賀芬咸，氣勢一時無兩。但哈化分組賽兩戰得兩分，若要出線再無失分空間，Mic少相信哈化可以食住個勢，一鼓作氣擊敗加拉塔沙雷。（有線足球台61周四凌晨3時45分直播）
哈化柏林此前兩場分組賽，都只能同對手打和，的確令人失望，不過此一時彼一時，哈化自從上次足協盃同名不經傳米達列斯悶和之後，知恥近乎勇，即刻聯賽連贏四場，包括擊敗榜首賀芬咸同老牌勁旅漢堡，成功重拾信心。如果單計主場，哈化戰績仲輝煌，近五場主場取得四勝一和。哈化食住個勢今場全力搶分，當然值得睇高一線。
加拉塔沙雷作客冇料到
另一邊廂，加拉塔沙雷分組賽三戰有六分在手，今場打和都可以出線，心態難免會傾向保守，爭勝欲望唔及主隊。而且加拉塔沙雷歐洲賽一向靠主場搵食，作客往往冇料到，事實上，呢支土耳其主強客弱特質，今季仍然冇變，近六場作客賽事只曾一勝，加上過去十次到訪德國，錄得三勝二和五負平庸戰績，包括上季作客以一比五慘敗利華古遜腳下，隨時有心理陰影，敗陣而回唔出奇。