02/12/2008
文： 江忠德
ESPN連續兩晚直播英聯盃八強激戰，今晚有場阿仙奴作客對英冠般尼，兵工廠英超大戰砌低車仔，聯賽盃對班生牯仔一樣咁重要，依家集中全副精神，希望好似近兩季咁，起碼殺到入準決賽，鬥心爆棚，應可輕鬆淘汰般尼。
兵工廠都算係神經刀，可以輸畀升班球隊侯城同史篤城，亦都畀曼城同維拉搞到一戙都冇，另方面又可以砌低紅魔鬼同車仔，不過講到底，反而今季阿仙奴贏得最清脆，就係聯賽盃。
阿仙奴按照慣例用班小朋友踢聯賽盃，上兩圈對錫菲聯同韋根，佢加埋入九粒兼零失球，踢到有聲有色。查實呢班年輕球員大部分過去兩季，都係專踢聯賽盃，所以實力唔差。最難能可貴，係呢班生牯仔對住爛仔型球隊，會以其人之道還治其人之身，戰術簡單又實際，快速走位第一時間交波等機會反擊，整體戰術體系運作成熟，減少浪費進攻機會情況，入波成功率自然大增。阿仙奴近兩季都同聯賽盃冠軍擦身而過，球員一直耿耿於懷，今晚一定會打醒十二分精神，砌低般尼殺入四強。