30/11/2008
文： 陳志康
今晚英超有「曼市打」同「車廠大戰」，呢困獸鬥當然好睇啦，但邊隊贏真係好在乎臨場發揮。有得揀，阿Cow今日反而對樸茨茅夫1.9倍主W有信心，縱使佢今場三線都隨時有主力唔踢得，不過對家布力般流浪呢期頹到爆，射手辛達告魯斯又傳離隊，負面新聞多多，我認為樸茅半力都夠殺！（now634台周日晚11:00直播）
樸茨茅夫一向畀人感覺都係體力好，防守勁。雖然佢上周對侯城有前鋒迪科爾、中場卡蘭積卡同中堅蘇甘保缺陣，但踢落唔算太曳，尤其係由中堅卡保奧、迪斯甸同防中柏巴迪奧普組成「巨人防線」，三個身高都超過一米九，擺呢三碌大柱後防度，真係唔睇得都嚇得！
高治搭巨人防線攻守平衡
至於右閘格連莊臣就更加唔使多講，呢位「爆炸頭」今季右路踢到曉飛，阿Cow至今仍然好回味佢上場球世界波；另外左翼比赫積亦有料到，加上長人中鋒高治，整體講樸茅攻守上依然好平衡，就算迪科爾今場唔出得，只要各人發揮到一貫水準，樸茅依然有睇頭。
相反，布力般流浪呢期傷兵唔算多，但聯賽卻已經連續八場未贏過。其實阿Cow認為布力般近排踢得咁曳，同射手辛達告魯斯離隊傳聞不無關係，大家真係唔好以為只係佢一個人事，畢竟告魯斯布力般地位舉足輕重，隊友聽到呢新聞真係會心掛掛，至於告魯斯本人就更加唔使講，呢期踢到冇晒影，怕且摩頓柏達臣今場出幾多靚波都冇用，對住樸茅劫數難逃！