30/11/2008
文： 九叔
金融海嘯底下，裁員消息無日無之，連日乙中游分子鳥棲砂岩都有樣學樣，一口氣將五件中後場球員踢走，搞到人心惶惶，今日主場對住力爭升班仙台維加泰，輸波絕對唔奇。
鳥棲本來都係爭升班分子之一，但係上場作客輸畀德島漩渦之後，即刻連一絲希望都幻滅埋。可能班老細唔多Like，輸波唔夠四日就宣布唔同五個球員續約，究竟跟手仲會唔會繼續派大信封都冇人知，隊波真係風聲鶴唳。當然，你可以話鳥棲剩番班人唔想冇得撈，今場實會搏甩髀，但係呢班波已經冇晒目標，亦唔排除有人自己諗定後路，搏唔搏真係冇人敢寫包單。
仙台升班目標明確
掉番轉頭講，仙台維加泰就有個明確目標，就係升班。由於大阪櫻花尋日贏波，仙台變成唔單只要追第二位山形山神，仲要今日贏埋鳥棲先至可以甩開櫻花，以免連第三位個升班附加賽資格都跌埋，鬥心肯定強過鳥棲，大家只要睇仙台件主力左閘田村直也，十月底右膝後十字韌帶受傷，原本要抖三個月，但係憑住堅強意志加適當治療，今日已經可以復出，就睇到仙台班人爭升班決心有幾強，佢個2.2倍客W又點可以唔買？