30/11/2008
文： 四眼哥
「四眼哥」之前都提過，轉型做波經之前係出跑本地足球記者，眨眼，已經係十幾年前事。想當年，「四眼哥」好勤力，幾乎每日都會落球場做操練，等球隊收操再同球員去飲埋茶，先再返公司寫稿打相。日日如是，「四眼哥」同好多球員都好好感情，當然隨住歲月，大家未必可以好似以前咁成日見，但係好多球員都有同「四眼哥」保持聯絡。
馬會調高里奧艾維客勝
話晒都係十幾年前識落，所以家陣仲踢緊都冇幾多個，大部分都已經轉晒行，好似同「四眼哥」同一年入行「豪豬」，今季退役之後已經全身投入自己娛樂同飲食生意；「四眼哥」睇住佢彈起「阿丘」，亦已經由昔日本地最佳後，成功轉型成為出色足球評述員同主持。
唔講大家未必知，其實「阿丘」足球生涯第一面甲組聯賽冠軍獎牌，家陣係放「四眼哥」愛妻銀行保險箱度。點解？話說「四眼哥」當年曾經轉行，「阿丘」就將佢首面聯賽金牌相贈，仲咁話：「你唔會捨得我，你總有一日會返轉頭，到時要將個聯賽獎牌畀番我呀！」
最後，果然畀「阿丘」批中，唔夠三年「四眼哥」真係做番體記，只係佢估唔到「四眼哥」會唔守承諾，冇還番個牌畀佢！哈！哈！今時今日我見面飲茶食飯，每逢講番呢件事，都會令「四眼哥」自動自覺去埋單。
近排波暴冷暴熱，各位哥仔出手前真係要睇定。好似今晚波咁，「四眼哥」睇到眼都矇埋，先搵到場叫做信心大。足智彩低泰羅芬斯主勝同和波，再畀高里奧艾維客勝，明顯睇高排名較低主隊可以搶到分，讓球平手盤梗係撐主隊啦！