30/11/2008
文： 江忠德
曼市打向來備受矚目，曼城上個賽季主客場雙殺曼聯，費爵爺深心不忿，等住機會報仇，不過曼城近期弗到漏油，而曼聯呢季作客仲未撻，對住冇乜心理壓力曼城，相信紅魔鬼會再次陷於苦戰。
曼城兵保飯碗唔敢側側膊
曼城近六次打戰三勝一和，形勢同心理上並唔輸蝕畀曼聯，較早前狀態沉一輪之後，突然回勇砌低兵工廠同歐協盃擊敗史浩克04，兩場入五粒認真唔簡單，球員信心爆棚，佢梗係聽到消息話中東老細大事招兵買馬，準備一月份轉會市場上花成兩億英鎊，所以呢個時候仲側側膊話就等炒，曼城班球員質素唔差，踢到搏晒命就邊隊都唔怕，更何況曼城入波能力呢季英超僅次車仔，遇正曼聯條後防線唔多穩陣，隨時以攻代守減輕守壓力。
至於曼聯方面，周中果然歐聯同維拉利爾好有默契咁踢和，亦都好明顯為今場留力，不過，佢今季作客信心差過以前，加上前鋒線上缺少貝碧托夫之後，朗尼同泰維斯冇乜默契，C朗又要經常防住畀對手蓄意踢傷，所以呢兩場冇入波。另外，潛在隱憂右路防守，奧沙踢呢個位容易出錯，驚佢未必頂得住羅賓奴，最怕到時候入埋都唔夠後防輸。