30/11/2008
文： 重炮手
歐聯輸波國際米蘭，今晚意甲主場對住拿玻里，究竟會唔會大數對方洩憤？就算數都只會係下半場事囉！事關拿玻里出名換邊前唔容易失波，而且國米班前鋒近排又撻極都撻唔，好大機會上半場無交收，「半場和」玩得過！（now633台周日晚10:00直播）
原來拿玻里今季二十場正式賽事中，有十六次半場係零失球，當中仲包括作客AC米蘭一仗！既然之前都冇畀聖西路球場氣勢嚇窒，今晚造訪國際米蘭亦有理由相信佢可以繼續保持淡定，再加上拿玻里後防無傷兵，今仗真係有條件四十五分鐘內保住不失！
20仗16次半場不失
何況，國米亦未必可以上半場就攻陷對手，原因係佢連歐聯在內近四仗都係下半場先入到波，似乎藍黑兵團就算有阿祖安奴同伊巴謙莫域兩大射手同場，都無想像中種破壞力，所以對住拿玻里或者會再次延續近四次全開半和走勢。