29/11/2008
文： Mic少
歐聯日前踢完第五輪分組賽後，好多名牌勁旅已經提早出線，講到今屆賽事最令人失望球隊，相信一定係雲達不來梅，出局都算數啦，竟然五戰未開齋，真係好對唔住球迷。既然不來梅冇能力兼顧兩邊戰線，出局對佢都係一件好事，可以專心踢聯賽，今晚主場對法蘭克福，不來梅能否反彈存疑，始終都係捧入球大盤勝算較高。
法蘭克福七連大
不來梅今季成績雖然未盡人意，但攻力並冇問題，聯賽十四戰入三十二球，遠比唔少前列球隊多，前鋒比沙路、羅辛貝治、中場迪亞高，三人入球數字絕對唔失禮。球隊問題係防線不濟，今季只有兩場聯賽冇失波，甚至對住升班馬慕遜加柏都要失三球，對於一支爭標球隊而言實在唔可以接受，不過佢聯賽逾七成開大比率，卻值得大家跟進。
法蘭克福近個幾月突然變得大開大闔，唔經唔覺已經連續七場聯賽開大，鋒線老將尼高里貝路普路斯，今季以三十三歲之齡由希臘登陸德甲，估唔到仲有一番作為，近三仗有四球進帳，加埋捷克小將芬連亦不時有佳作，一老一嫩組合擦出火花，有力攻破不來梅大門，即使今場入球中位數提升至3.5球，入球大亦值博。