29/11/2008
文： 阿武羅賓
細個陣好日都冇場直播波睇，有得睇就鬼咁開心，估唔到依家發展到一日咁多場波直播，睇到自己都有厭，真係多得馬會開檔，一個「賭」字引起各個電視台爭住播波，早前兩大收費台鬥出高價爭播映權，近日兩個免費台亦投入更多資源播波，聽講遲連瑞典超同俄羅斯聯賽都有得睇。
燕豪芬歐聯搏殘
今晚三色台又有免費波睇，海倫芬主場對燕豪芬，雖然今季荷甲直播波多數開細，但羅賓今次唔信邪要大，皆因海倫芬一向都係主攻球隊，聯賽十二場開十場大，面對打完歐聯疲兵燕豪芬，再開大唔難。（無翡翠台周日凌晨3時45分直播）