29/11/2008
文： Jo Wai
金融海嘯搞到人人充斥怨氣，好多朋友做蟹民，約出食餐飯竟然話冇「蚊」而向我Say No，真係好冇癮！不過，經濟差絕對唔會影響我呢個愛靚之人，總之街照行、衫照買、袋照掃，依家壓力咁大，度住度住使，做人邊開心？辛苦搵銀都係為享受，大家都唔應該虧待自己，Right？
話時話，近期行街發現唔少舖頭做緊超級Sale，唔係八折、九折咁簡單喎，而係80%甚至90%off啊，Oh my god！行過呢間舖話租約期滿要錢唔要貨，間又話共度時艱割喉放血益街坊，睇生意真係幾難做。Jo Wai雖然唔係搞生意，但都知商業世界同感情世界冇乜分別，二者同樣係汰弱留強，若然唔夠人爭，索性摺埋彈開，唔好度獻世，怨天怨地有乜用，我最唔Buy呢套，OK！
恩華尼斯預輸
查實只要有「食力」，根本唔使怕逆境，就好似些路迪咁，佢周中歐聯輸畀阿爾堡，係就係羞家，不過一場半場輸波，So What！小小挫敗絕對動搖唔到呢支蘇格蘭班霸地位，今晚返到蘇超對住恩華尼斯，又輪到佢惡，事關兩隊波完全唔同級數，家陣天氣轉凍又風高物燥，已經谷谷埋埋躁躁些路迪真係好易辣，真係贏一粒都嫌少啦！我就覺得「讓球主勝」同大盤都好穩陣，你都諗諗啦！（now 825周六晚11時直播）
Jo Wai
新一代界女神，跳跳紮冇時停，鍾意做運動keep住至弗體態。波唔會落場踢，但就鍾意睇，只要得閒就乜聯賽直播都唔會放過，有樣有身材仲識波，問你點頂！