“茅夫”作客冇得“禾”

今晚繼續介紹一場歐洲足協盃，由德甲實力派的禾夫斯堡對英超硬朗派的樸茨茅夫，應該屬於一場勢均力敵之戰。可惜“老樸”作客戰績冇保證，加上禾夫斯堡近況神勇，只要踢出水準，今仗仍可睇高一線，初盤讓半球照捧。

禾夫斯堡近三仗表現極佳，先擊敗德甲實力分子史特加，再在足協盃作客力挫布拉加，而上周聯賽對住多蒙特更加反客為主，狂攻猛打可惜未能贏波。大打進攻足球的確值得讚賞，陣中波斯尼亞雙煞迪施高與米斯莫域，再加一個巴西奇兵格拉菲迪殺傷力驚人，三人包辦近六場比賽的十六個入球，難怪球隊在聯賽可以入三十二球，再加兩場足協盃入八球，如此強勁入球能力，“老樸”後防今仗真係要醒醒定定。

兩仗只得一分，“老樸”今晚一定要搏，但如果只顧進攻而忽略防守，“老樸”一定死硬。另外“老樸”今季作客只贏過兩場本土聯賽，而作客布拉加更加慘吞三蛋，認真靠唔住，值得一提，前鋒有哥洛治、迪科爾及簡奴，入球能力亦唔差，入球開“大”應該冇走雞。

推介：禾夫斯堡 3：1