西維爾食“塞”咁食

西甲今晚有場好戲碼，由西維爾火倂巴塞羅那。西維爾近兩三季已成為西甲列強之一，即使對住兩大班霸皇馬及巴塞，西維爾都絕不遜色，以近三次對巴塞為例，兩隊都不分勝負，證明今仗同樣勢均力敵，臨場發揮成為今仗勝負關鍵。

西維爾近況相當不俗，連埋西班牙盃四戰三勝一和，上周戰和華倫西亞亦保持極佳水準，目前西維爾只差巴塞五分，排第五位，只要今晚贏波就可以拉近距離，繼續保持爭標機會，陣中一班主力，艾迪安奴、拿華斯、馬利斯卡、列納圖、簡洛迪及費比安奴等，近兩季合作無間，無論默契與配合都有勁旅風範，不但止中前場實力強橫，後防線亦穩健十足，十三場聯賽只失八球係西甲之中失球最少的一隊，巴塞鋒線有幾強？未驚過。

巴塞上周與加泰打和一比一，終止聯賽九連勝紀錄，而美斯缺陣，再一次證明巴塞仍依賴個別球員發揮為主，如果講到打整體戰，巴塞可能輸蝕。其實巴塞之前九連勝對手當中只有馬體會及畢迪斯較強，今晚作客西維爾冇咁好彩。

推介：西維爾2：1