小“兵”淪陷有危“基”

阿仙奴接二連三在聯賽輸波，英超爭標機會越嚟越渺茫，以近期表現所見，的確擔心歐冠盃小組賽能否順利過渡，事關小組賽領先優勢唔多，今晚場波有乜三長兩短，分分鐘連歐冠盃都玩完。其實今晚對手基輔實力唔差，首回合阿仙奴都要在完場前一刻先可以逼和對手，今晚主場再唔醒醒定定，隨時大意失荆州，讓波的確諗唔過。

上周聯賽慘吞曼城三蛋，防線踢到失魂落魄，而進攻又欠缺節奏感，其實都冇得怪，鬼叫陣容天殘地缺，上星期國際賽令雲格傷亡慘重，華確特、沙格拿、杜尼及艾保爾個個做晒“十字軍”，而加拿斯又要接受內部停賽，後防即時變成重災區，難怪畀曼城攻到手足無措。今晚基輔前鋒亦非二打六，幾內亞國腳賓高拿步大力雄兼衝刺力強，而米利夫斯基屬於幼細技術型，一剛一柔隨時可威脅阿仙奴防線，至於基輔防守亦相當硬淨，攔截中場古斯夫及烏克蘭一號門將蘇高夫斯基絕對係有料之人，打突擊更加係基輔強項，阿仙奴一班小將在壓力之下，今仗確有隱憂。

推介：和波 1：1