車仔專拆“紐”

車仔目前與利物浦咁高咁大並列聯賽榜首，為確保一哥位置不變，每場比賽都不容有失，今晚主場迎戰紐卡素必定會大開殺戒，以車仔當前入球能力及紐記紙紮防線，入球開“大”一定冇走雞，而初盤開出車仔要讓球半/兩球，似乎讓得多啲，但車仔仍然值得一博，因為紐記實在唔爭氣，認真幫唔落。

車仔十三場聯賽已經射入三十二球，入球數字係各隊之冠，而係今季各項賽事當中，更有八場贏過對手三球或以上，單憑呢個數據，車仔今仗應該至少贏兩球。雖然安歷卡唔屬於頂級前鋒，但勝在有充足支援，迪高、林伯特、布歷克及馬路達等都製造唔少入球機會，即使安歷卡三次能夠把握一次機會都已經夠贏，何況今場對住弱不禁風的紐記後防，真係大把“餐士”。

紐記防線的確弱到不得了，幾乎每場波都有失球出現，防線有如酒店自動門一樣，埋到嚟就自動彈開，尤其是中路防守，指下個“鼻”話入就入，試問呢條豆腐防線又點頂得住一支最強攻力的車仔。