04/12/2008
文： 周姐輪
禾夫斯堡馬加夫帶領下有聲有色，今晚歐協盃E組賽事遇上「新丁」樸茨茅夫，有權主場球迷吶喊助威下贏波。觀乎主客和賠率，莊家擺明睇淡樸茨茅夫，加上足智彩直情開埋「讓球主客和」，禾夫斯堡狠讓一球明顯有計，不過買波都係求穩陣，禾夫斯堡1.8倍主勝，大家可放心起筷！（開賽時間：周五凌晨3:45）
近五次歐洲賽主場不敗禾夫斯堡，暫時歐協盃E組兩戰全勝得六分，排名僅次於打多一場AC米蘭，出線形勢相當樂觀。
咁又係，練馬加夫以前帶領拜仁慕尼黑南征北討，有咩風浪未見過，而且佢旗下班球員亦臥虎藏龍，右閘薩卡度同中堅巴沙利都係前意大利國腳，日本中場長谷部誠同埋射手米斯莫域亦好評如潮，上次主場喪炒海倫芬五比一，已經知禾夫斯堡係典型地頭龍，今仗強勢出擊，甚具捧場價值。
樸茨茅夫第一次踢歐協盃，球員心情一定緊張，所以頭兩輪分組賽只取得一和一負成績。呢支英超球隊最大問題，原來係有「德軍恐懼症」，但係患上此病並唔係樸茅球員，而係佢領隊阿當斯。
樸茅三主力打柴
點解咁講？因為根據紀錄，阿當斯球員時代對過德國隊三次，結果係一和二負未威過，似乎佢自己對德國機動式踢法都冇乜計仔，仲邊有辦法幫樸茅全身而退？再講，中堅蘇甘保、防中狄亞拉同埋前鋒烏達卡倦勤，樸茅前中後三線都有主力唔踢得，今仗作客「狼堡」睇怕都係等！