03/12/2008
文： 關爺
今晚關爺推介歐洲足協盃西維爾及莫斯科斯巴達可在主場大數對手，齊捧「讓球主勝」。C組西維爾上周末慘敗在巴塞隆拿腳下，誓篤定出局柏迪遜洩憤（周四凌晨3時45分開賽）。D組奈梅亨分組賽兩戰全敗未夠班，作客冰天雪地莫斯科九死一生，斯巴達贏波冇難度。
先講C組賽事，塞爾維亞球隊柏迪遜分組賽三戰全敗，已經出線無望，今場對佢講只係例行公事，反而出線熱門西維爾由於第二輪分組賽作客不敵標準列治，目前兩戰得三分僅排第四，想出線餘下兩輪不容有失，既然同組其餘三支競爭對手都能擊敗柏迪遜，西維爾更冇失分空間。雖然佢上周末聯賽○比三不敵巴塞隆拿，但勝負關鍵在於對手把握力強，整體演出未見太大走樣，今次續於主場出擊，自然要大勝一場吐烏氣，主W得1.15倍食之無味，可直取「讓球主勝」。
斯巴達摘「梅」冇難度
另一場D組賽事形勢相似，荷甲奈梅亨兩戰全敗，雖然數字上仲有出線機會，但連練比恩上場分組賽輸畀熱刺後都承認自己球隊未夠班踢歐洲賽，就知佢同其他球隊實力有一段距離，俄羅斯聯賽已收咧，莫斯科斯巴達可專心應付足協盃，而且目前俄羅斯正值嚴冬，奈梅亨作客更難踢，1.52倍主W固然好穩陣，進取可捧埋2.5倍「讓球主勝」。