30/11/2008
文： Mic少
羅馬同費倫天拿上周中歐聯命運各異，前者贏波出線在望，後者則黯然出局，一邊天堂，一邊地獄，事實上，即使唔計歐聯，羅馬近期士氣同狀態亦遠勝費倫，尤其係隊長托迪擺脫傷患陰影，撐番起整支球隊，而且羅馬急須搶分爭上前列，今仗主場出擊，相信可以食住個勢，擊敗費倫天拿。（now 635周日晚10時直播）
兩軍今季演出都唔及上季，特別係羅馬依家仲位處聯賽榜下游，不過呢支首都球隊已經走出艱難時期，由歐聯擊敗車路士起，近五仗取得四勝一和，氣勢一時無兩。羅馬季初大跌Watt，主因係靈魂人物托迪養傷缺陣，呢位羅馬王子復出，兼重拾佳態之後，情況已經有一百八十度轉變。球隊近四場賽事之中，托迪三場有波入，依家羅馬有番晒上季聯賽亞軍霸氣，未來比賽值得長追。
費倫天拿作客差勁
至於費倫天拿，雖然目前聯賽成績好過羅馬，但近期走勢同羅馬相反，表現跌跌碰碰，作客演出極之差，到訪錫耶納同卡利亞里都敗陣而回，可見費倫根本唔夠兵力應付聯賽同歐聯兩大戰線。
另外，費倫入波太依賴基拿甸奴，今季有一半聯賽入球由佢射入，如果呢位前鋒有所失準，肯定對球隊造成極大影響。再睇往績，費倫天拿近六次作客羅馬，錄得一和五負慘淡成績，睇怕今仗難逃再敗厄運。