30/11/2008
文： Jamie Yeo
今晚英超兩場重頭大戰，戰情一定精彩兼充滿戲劇性，各位球迷要擔定仔、霸定頭位，唔睇第日同朋友真係冇話題。「曼市打」先打頭陣，上季曼城兩剃紅魔鬼眼眉，費格遜嬲到震，今場一定夫添盡出望復仇；而阿仙奴今季對強隊好有計，作客車仔有機反彈。
曼聯一向趾高氣揚，但去季鬥同市曼城卻冇晒辦法，無論主場同作客都敗陣而回，畀曼城粉絲笑到佢面黃。經歷奇恥大辱，曼聯高度重視今晚場波，無論領隊同球員賽前都高調談論，甚至抨擊對手，其中朗尼就話，雖然曼城依家大富大貴，但根本仲未係曼聯對手，睇曼城排名幾低就知喎。但曼城今夏淨係買羅賓奴一個巨星，人腳當然仲未夠曼聯砌啦，不過出年一月曼城真正增兵後，就唔係咁講法喇。曼聯今晚大恰細，可以贏番場。
兵工廠闖史丹福橋未必輸
阿仙奴作客車路士，上周中兩軍歐聯表現都唔好，「兵工廠」近期更踢到一塌糊塗。領隊雲格目前備受壓力，好多「廠迷」已經睇佢唔順眼，但佢的確係有料頭，真係好希望雲格轉會市場重開後，可以買入巨星救亡。阿仙奴早前低潮都可以打敗曼聯，今次將士用命去到史丹福橋，可保不敗。
Jamie Yeo
新加坡辣妹才女，身兼模特兒、電台DJ及STAR Sports周四晚8點足球節目《Football Crazy》主持人，體育、娛樂、音樂樣樣精，但最鍾意都係睇英超！