30/11/2008
文： Rita
上周中歐洲足協盃賽事，德甲球隊成績未如理想，其中史特加同史浩克04，都出師不利未能取勝。同是天涯淪落人，今晚雙史同屬失意大軍，兩支球隊梗係一肚氣，誓要搵對方做出氣袋，小妹睇好開大。（有線體育台62周一凌晨零時直播）
史浩克射手法芬腳風順
兩隊近績認真麻麻，客軍史浩克04相對較好，近五場聯賽成績取得三勝二負，而兩次敗仗分別輸畀利華古遜及拜仁兩支勇銳球隊，算係情有可原，不過佢上周中足協盃，人腳近乎「夫添」上陣，竟然主場吞曼城兩蛋，令眾人大跌眼鏡，認真激死人！即使下半場中段換入好氣好力艾沙姆出搏命，球隊亦返魂乏術，可見史浩克球員狀態唔好，練亦冇晒計！話雖如此，總信爛船有三斤釘，球員實力點都有個底，而近日留意到法芬頻頻有「士哥」，聯賽入球數字步步逼近古蘭爾，有呢位秘魯前鋒在陣，史浩克今場應該有波入。
主場史特加近況比史浩克更不濟，近五場聯賽未嘗一勝，不過今仗居然開出平手盤，似乎暗藏有反彈之意。史特加主力射手馬里奧高美斯雖然近期有死火，但球隊勝在有中場蘭歷腳風順，今場同樣有機入波，今場雙史大戰，主客和難捉路，倒不如眼兩隊毋須留力，肯定有戰意全力搶分數，因此寧敲「入球大」！
史特加Vs史浩克04
入球大