30/11/2008
文： 關爺
今晚德乙大部分都係聯賽排名接近球隊互相對壘，要挑選一支佔明顯優勢球隊並唔容易，不過只要細心研究一下，又未必咁難。關爺睇中聖保利主場對恩高斯達特。聖保利係今季德乙一路奇兵，主場戰績更勝唔少前列球隊，練史坦羅斯基即將續約，更可穩定軍心，而且客軍近期表現走晒樣，相信1.72倍主勝可以順利開出。
聖保利今季進步明顯，表面上位處中游，但積分並非落後太多，係爭升班主要球隊，上仗即使作客面對榜首緬恩斯，都可以同對方平分秋色。聖保利最犀利係主場威力，今季七場聯賽主場出擊，取得五勝二和，勝出率逾七成，聖保利主勝自然係過關好選擇。
1860細繼續追
恩高斯達特同好多升班馬一樣，虛火一過就冇料到，球隊近兩仗都分別以○比三大敗，士氣同信心都大受打擊，呢類球隊往往靠一道氣爭勝，依家呢道氣被打窒，未來賽事恐怕難以再踢出早前水準。
另外，1860慕尼黑主場對韋恩，1860近五場聯賽無論贏、輸或打和，比數總入球都唔多過一球，而韋恩七場聯賽作客入得三球，今場屬於正宗開細格局。另一場格雷特霍夫相反，攻強守弱，主場對弗賴堡，開大機會高。