30/11/2008
電影《海角七號》最近成為全城熱話，偏偏和仔都係鍾意睇波多過睇電影，男人老狗邊會對愛情小品有興趣，都係埋身肉搏鬥智鬥力英超我多！今晚就犀利喇，英超上演「打星期天」！頭場先個「曼市打」曼城鬥曼聯，淨係睇羅賓奴同C朗都夠期待啦！尾場又「倫敦打」，由車路士主場對阿仙奴，呢個「英超打日」仲好睇過戲啦！
食完個頭盤就輪到主菜喇！車路士對阿仙奴呢場倫敦打，可以話係星光熠熠，不過阿仙奴最近內部「立立亂」，新人接班方面又好似急，穩打穩紮講都係捧車仔比較安心。（now632台周一凌晨0:00直播）
倒戈安歷卡弗到爆
卡維奴同艾辛仲抖緊，不過杜奧巴同埋波歷克兩位星級大將已經復出，車仔進攻瓣數多，贏波自然有把握。倒戈射手安歷卡呢期弗到爆，令人諗番起佢以前力兵工廠時期風采，呢場佢同艾殊利高爾兩個反骨仔齊齊搞破壞，有權令舊主失威。
阿仙奴都有加拿斯掉轉槍頭，但呢位法國後最近爆晒球會內部不和問題出，依家人人都知尹佩斯球隊入面犯眾憎，呢件事仲激到領隊雲格生蝦咁跳，連隊長都唔畀加拿斯做，真係醜死怪！不過和仔呢場睇淡阿仙奴，係因為佢有幾件主力傷，影響最大就梗係「超音鼠」禾確特唔踢得啦！大戰當前都係車仔班巨星壓到場，藍戰士Sure Win！