30/11/2008
曼城球迷曾經講過，如果可以贏曼聯，就算球隊要降班都制！咁激進，可想而知兩隊幾大仇口。冇錯曼城上場大炒阿仙奴令人眼前一亮，但和仔始終對呢支忽然富貴球隊有所保留，佢進攻太倚賴羅賓奴，後防又有李察鄧尼呢個計時炸彈，隨時對手入唔到波，佢都幫你擺烏龍搞掂，而幾件巴西兵好似祖奧同艾蘭奴又盛傳極度唔妥領隊曉士，所以曼城仲有好多問題未解決，未去到爭標班次。（now632台周日晚9:30直播）
歐聯出線英超搶
曼聯上周中同維拉利爾悶和，宣布提早歐聯分組賽出線，依家心無旁騖，都係時候擺多心機踢番好聯賽，費事畀車路士同利物浦拋離得太遠。費Sir其實對呢場曼徹斯特打有晒部署，佢上周中叫雲達沙休息，唔使佢飛去西班牙，加上幾個一直傳有傷球員，好似里奧費迪南、C朗、費查同朗尼都行得走得踢得，今仗同市兄弟相殘一定誅死曼城，1.75倍客勝有計。