30/11/2008
文： Kiko
唔經唔覺仲有廿幾日就係聖誕節，原本諗住去旅行玩，點知呢期經濟唔多好，連帶我Model Job都少好多，之前都算幾穩定，可定期去酒吧做酒吧Show，點知呢期連我做開兩三間酒吧都話生意麻麻，可能未必捱到過年，真係慘情！既然呢期冇乜工開，一於加多兩錢肉緊搵多意甲正料益大家好過！
紫百合作客走樣
今日Kiko揀場意甲大戰，就係羅馬主場迎戰費倫天拿。「雌狼」今季聯賽開咧認真麻麻，但勝在質素班底唔錯，近期終於止跌回升連勝兩場，其實近期隊中幾名中前場主力好似托迪、巴迪斯達同胡仙歷狀態逐漸回勇，終於見番以往地波推進流暢羅馬，剛過去周中歐聯分組賽更作客擊敗克盧日，令出線形勢大好。依家佢士氣正盛，主場出擊冇有怕！
反觀「紫百合」由於板深度唔夠，要兼顧意甲同歐聯搞到頗為吃力、進退失據，上周中歐聯主場不敵里昂，宣布十六強夢碎，大大打擊士氣。無疑佢聯賽成績算唔錯，弊在只係局限於主場出擊，一到作客時表現就大為走樣，今季六場作客輸四場，所以今場去到奧林匹高球場都幾危！