30/11/2008
文： 阿占
今季意甲可算近年戰況最緊張刺激一季，除國際米蘭繼續帶頭外，季初AC米蘭、祖雲達斯成績都算Keep得唔錯，加埋新勢力拿玻里同烏甸尼斯度搞搞震，令意甲競爭性大為增強。講到戲碼今晚尾場巴勒莫對AC，就真係唔可以錯過，因為「紅黑兵團」已提早出線歐協盃第三圈，現可全力出擊聯賽，2倍客勝穩陣！（有線62周一凌晨3:30直播）
巴勒莫近期表現麻麻，連續三場聯賽都失分，上場更加極度辛苦情況下先至逼和博洛尼亞，似乎呢隻「傻豹」今季真係回晒塘追唔過。雖然佢近六次主場出擊錄得四勝二負，唔算太差，但細心可以睇到佢輸兩口，分別係國際米蘭同費倫天拿，足證就算有主場在手，對住強隊就現形，加上賽前傳出前鋒米高利可能會帶傷上陣，或會影響攻擊力，所以今場都幾危！
巴勒莫往績輸晒
相反AC米蘭今季真係幾醒神，近十六場正式比賽包括盃賽在內賽事中保住不敗，早排更嘗過聯賽一哥滋味！雖然今場卡卡需要停賽，好在「細哨」朗拿甸奴今季可能無咁爛蒲，回復最佳狀態，罰球助攻樣樣有！有佢度加埋施多夫、恩沙基等，火力一樣冇問題，睇埋往績雙方近七十六年交手四十六次，其中AC米蘭有三十八次保持不敗，佔有壓倒性優勢，所以我阿占敢擔保客勝做過關全冇問題！