30/11/2008
文： 走肖
天氣轉冷，手腳好易唔聽話，韓職季後賽準決賽今日爆發，FC首爾主場迎戰蔚山現代，1.65倍「讓球客勝」有得諗，事關首爾已經休戰三周，即使走勢點靚，球員攤凍晒都好難踢波，更何況佢陣容殘缺，對住冤家蔚山肯定惡踢，主W好難開得出。（開賽時間：周日下午1:15）
巴勒莫往績輸晒天殘地缺對賽不勝
常規賽亞軍首爾，今季首度季後賽出場，就要同蔚山爭出線，認真唔好彩，因為兩隊近六次對賽，蔚山取得一勝五和，即係話一個唔覺意，首爾就可能被踢出局。最麻煩係，呢隊首都球會三個星期冇正式比賽，即使佢連盃賽近十九場有十四勝四和一負，前土耳其國家隊練根拿斯都好難撻番隊波。
根據首爾官網報道，射手鄭祖國會傷愈復出，但國家隊翼鋒李青龍要停賽，箭頭李聖阮、後防安泰根仲有傷，點都排唔出最強陣容；相反蔚山季後賽表現穩定，接連淘汰排名較低浦項制鐵同全北汽車，南韓國腳廉基勳亦打破個人入球荒，配合近十八場有十二勝三和三負，有足夠實力入總決賽。