30/11/2008
文： 自由
上周意甲多隊熱門都失諸交臂，今晚全球焦點落英超兩場重頭打，預料其他賽事戰果應該冇咁古靈精怪。筆者睇好意甲主場王熱拿亞，可以擊敗換帥後未見有太大起色博洛尼亞，1.53倍主W值得熱捧。（now636台周日晚10:00直播）
意甲踢接近三分一之後，相信冇人估到主場王竟然係熱拿亞，佢今季自己地頭六戰全勝，計埋作客賽事，近九戰都只係輸過一仗，射手迪亞高米列圖更連續四場有士哥，腳風順到不得了。博洛尼亞改由米赫洛域領軍之後仍未贏過，近五次作客更只得一和四負，沉到冇人有，出戰熱拿亞都係凶多吉少。
聖伊天換帥冇起色
其實唔係隊隊波都好似熱刺一樣，換帥之後可以雨過天青，法甲聖伊天月中改由皮連領軍之後戰績毫無改善，聯賽更已經連輸七仗，近三場法甲更加係食白果，今晚作客近六場聯賽都有波入南錫，似乎都要繼續沉淪。（開賽時間：周一凌晨0:00）
近期周日荷甲戰果都幾正路，今晚一於唔拗頸，博奈梅亨可以大炒包尾大幡禾寧丹，開番個1.7倍「讓球主勝」。雖然禾寧丹近期已經冇咁甩轆，但畢竟今季作客六場輸晒之餘，更加係一球波都入唔到，當中五場更輸多過兩球或以上，對手奈梅亨話晒今季都主場贏過燕豪芬，今場炒唔起禾寧丹都對唔住捧場球迷。（開賽時間：周日晚9:30）