29/11/2008
文： 陳志康
上周[被屏蔽广告]英超爆到七彩，好彩阿Cow都成功貼中史篤城贏西布朗。話時話，西布朗呢期真係唔多掂，所以我今日決定繼續追佢對家—韋根。韋根隊中可以話冇乜星，但勝在三線實力夠平均，相信今晚可以挾住上場贏愛華頓氣勢，對西布朗呢場護級大戰再下一城，一於捧1.72倍主勝！（now635台周六晚11:00直播）
最近南華冇比賽，好多人都以為阿Cow好得閒，查實一都唔係，好似星期三咁，上晝去贊助南華健身中心做gym，到下晝就去董之英波，生活不知幾充實！
講番今日心水，韋根上周終於擺脫低潮，主場以一比○擊敗愛華頓，跳番上十五位，暫時為護級舒一口氣！其實韋根上仗個陣都幾殘，中堅保斯停賽，右閘米茲洛又倦勤，不過替工賴恩泰萊同舒卓拿都做足本分，加上中前場多回防，防守仍然極之嚴密，今晚有番保斯復出，照計應該會更加穩陣。
西布朗三連敗火力曳
進攻方面，大家一定要睇實路爾斯華倫西亞同柏拉西奧斯，有佢度，箭頭希斯基唔愁冇彈藥供應，當然，大家亦唔可以忽視上場後備入替取得奠勝入波前鋒亨利卡馬拉。基於呢場係護級大戰，阿Cow估計韋根領隊布魯士將會擺大個頭，放埋亨利卡馬拉出，必要時甚至派埋有機會復出沙基上陣，實行強攻三連敗、狀態曳到爆西布朗。如果前鋒貝特拿同伊斯美米拿仲好似之前幾場咁冇貨賣，我敢講西布朗呢場贏波機會將會係零。