29/11/2008
文： 李健和
嘩！聽晚英超列強對撼，相信大家都好期待，不過今晚德甲方面一樣有大戰上演，就係由兩支傳統勁旅利華古遜同拜仁慕尼黑正面交鋒。講真利華古遜今季都幾Sharp醒，但撞正復甦拜仁，就整定佢冇運行，有地利都冇用，呢場波和仔睇好奇連士文可以帶領拜仁全取三分！（有線61及64周六晚10:30直播）
德甲依家最Hit係賀芬咸，呢支神奇球隊目前高踞榜首，連利華古遜同拜仁兩大巨人都要靠邊站，都咪話唔羞家。今仗兩隊交手，得益其實又係賀芬咸，但如果唔想畀人拋離，利華古遜同拜仁都唔可以再有差池，可想而知今晚呢場德甲大戰會有幾激！
利華射手傑斯寧飄忽
射手希美斯係利華古遜勝負關鍵，呢件9號仔已經連續三場入波，狀態相當弗，但弊在樹大招風目標太明顯，好容易畀拜仁箝制，畢竟佢前鋒拍檔傑斯寧演出比較飄忽，而前德甲神射手基卡斯仲大跌Watt冇晒料，希美斯真係獨力難支。另外，後杜姆需要停賽，中場「定海神針」舒尼達又養傷，利華古遜確實有唔少隱憂。
拜仁就得右閘沙洛同埋中場咸美艾天托普兩名長期傷兵，陣容比較完整，能傳擅射列貝利狀態大勇，「雙塔」東尼同高路斯無論德甲同歐聯都頻頻入波，難怪近十場正式比賽都保持不敗，當中仲贏八場，走勢非常凌厲，所以今場作客利華古遜都唔使驚，客勝冇問題！